ILOILO – Pagasugaton sang Municipal Disaster Risk Reduction and Management Officer sang San Miguel, Iloilo ang magapauli nga Overseas Filipino Worker nga tumandok sang nasambit nga banwa.
Sa interview sang Bombo Radyo kay Mayor Marina Gorriceta, iya ginpahayag nga operational kag kumpleto na sa gamit ang quarantine facility nga pagatiniran sang isa ka Overseas Filipino Worker nga residente sang San Miguel.
Suno kay Gorriceta, ang regional evacuation center amo ang magaserbe nga quarantine facility sang banwa kag antes pa man ang pag-abot sang repatriates sa Iloilo buwas nga adlaw, nahitso na kun sin-o ang magasugat kag kun diin ang quarantine facility.
Ginpahayag ni Gorriceta nga ang Local Government Unit mismo ang magahatag sang pagkaon sa Overseas Filipino Worker tubtub nga mapaguwa ang resulta sang Polymerase Chian Reaction test.
Samtang, nakahanda na ang isolation center sang Local Government Unit sang Dumangas, Iloilo.
Sa interview sang Bombo Radyo kay Mayor Ronaldo ‘Onal’ Golez, iya ginpahayag nga nahingagaw sa pagtapos ang evacuation center nga pagatiniran sang magapauli nga Overseas Filipino Workers.
Suno kay Golez, magluwas sa bag-o lang natapos nga evacuation center, mahimo man nga magamit nga isolation center ang mga ekswelahan sa nasambit nga banwa.
Ginpahayag ni Golez nga santo sa ginkasugtan, ang maga-abot nga Overseas Filipino Workers ang ipaidalom sa Polymerase Chain Reaction test sa syudad sang Iloilo antes ipasugat sang Local Government Unit agud dal-on sa isolation facility.
May iban naman nga Local Government Unit suno kay Golez nga nagpahayag nga sa ila na lang banwa patigayunon ang Polymerase Chain Reaction test kag kun magnegatibo, mahimo na nga papaulion sa ila balay ang Overseas Filipino Worker.
Sa subong suno sa alkalde, wala na sang Person Under Monitoring kag Person Under Investigation sa banwa sang Dumangas.
