May mga report nga naga-guwa nga nagsugtanay na ang Israel kag Palestinian militants nga magpatuman sang ceasefire sa Gaza matapos nga nagpatunga ang Egypt.
May Egyptian security source nga nagpahayag nga nagpasugot ang Israel sa proposal, apang wala naman ini ginkumpirma sang spokespeople para sa Israel kag Islamic Jihad. Ang ginpahayag lang amo nga padayon ang pag-contact subong sa Cairo.
Suno sa Gaza officials, 31 na ka Palestinians ang napatay lakip na ang anum ka kabataan kag mga Palestinian Islamic Jihad group fighters lakip na ang duha ka mataas nga lider nga sanday Khaled Mansour kag Tayseer Jabari.
Halos 600 ka Palestinian rockets kag mortars ang ginpalupad pa-Israel halin sang Byernes suno sa isa ka Israeli official.
Sabat pa sang Israel, gin-launch sang pungsod ang amo nga mga operasyon bangud nakabatyag ini sang pamahog halin sa Palestinian Islamic Jihad.
Ini nga bayluhanay-pwersa amo ang pinakaulihi nga natabo sa tunga sang Israel kag Gaza umpisa sang natabo ang onse ka adlaw nga away sang Mayo 2021 kun sa diin masobra 200 ka Palestinians kag madamo man nga Israelis ang nagkalamatay.
Una na nga nagpahayag ang Israeli military nga ang ila latest operation nga may codename nga “Breaking Dawn” ang mahimo maglawig sang isa ka semana.
Sini lang nga Domingo, ang Palestinian rockets halin sa Gaza Strip ang nakadangat na sa Jerusalem — labing-una nga natabo halin sang kumplikto sang 2021.##
