Natapos na ang ceasefire sa Gaza kasunod sang makakilibot kag makamamatay nga pag-atake sang Israel sa gintawag nga “extensive strikes” sa Hamas targets.
Sa amo nga pag-atake nga natabo Martes nga adlaw sa Gaza, indi magnubo sa 400 ang patay kalakip na ang madamo nga kabataan.
Ini ang pinakamakamamatay nga pag-atake sang Israel sa sulod sang 17 ka bulan nga giyera batok sa Hamas.
Si Prime Minister Benjamin Netanyahu ang nagmando sang amo nga strikes, matapos namalibad ang Hamas sa demands sang Israel nga bag-uhon ang ceasefire agreement kaangot sa pag- release sang hostages.
Suno sa mga officials, ang operasyon ang ginalauman nga magsangkad pa.
Nagsiling naman ang White House nga ginkonsulta ini sang Israel kag nagpahayag ang Washington sang suporta sa tikang sang Israel.
Samtang, ginpakamalaot naman sang mga pungsod sa Europa ang ginhimo sang Israel nga pag-atake sa Gaza.
