May nalab-ot na nga kasugtanan ang Israel kag Hamas agud matapos na ang 15 ka bulan nga gyera sa Gaza nga nagbilin na sang masobra 46,000 ka mga patay sa Palestine kag nagpasingki sang kinagamo sa Middle East.
Pasado alas tres kaina sang kaagahon oras diri sa Pilipinas sang ginkumpirma ni US President Joe Biden ang maayo nga balita. Dala sini ang pasalig nga malapit na lang makapauli sa ila pamilya ang nabilin nga mga bihag nga yara sa Gaza Strip umpisa sang Oktubre 2023.
“I can announce a ceasefire and a hostage deal has been reached between Israel and Hamas,” suno kay Biden sa iya pag-atubang sa press sa White House.
“It is the result not only of the extreme pressure that Hamas has been under and the changed regional equation after a ceasefire in Lebanon and weakening of Iran — but also of dogged and painstaking American diplomacy,” dugang sini.
Sa inisyal nga reports, ginapahayag nga anum ka semana ang initial ceasefire phase.
Ginaalegar nga nalakip diri ang pag-atras sang pwersa sang Israel sa Gaza Strip kag ang paghilway sang mga bihag sang Hamas bilang kabaylo sang Palestinian prisoners nga didto naman sa Israel.
Nalakip sa Phase 1 ang 33 ka Israeli hostages lakip na ang mga kababainhan, may kabataan, kag may mga kalalakihan nga masobra na sa 50 ang edad.
Ginapahayag nga magasugod naman ang negosasyon para sa ikaduha nga phase sa ika-16 nga adlaw sang phase one kun sa diin ginalauman nga malakip ang iban pa nga mga bihag, maimplementar na ang permanent ceasefire, kag dalayon na nga i-withdraw sang Israel ang ila tanan nga pwersa-militar sa Gaza.
Ang third phase naman amo ang ginalauman nga magatutok sa pagbalik sang mga bangkay kag umpisahan man ang pagkaayo sa Gaza sa idalom sang superbisyon sang Egypt, Qatar, kag United Nations.
Ini nga agreement ang nalab-ot kasunod sang binulan nga negosasyon sang Egyptian kag Qatari mediators nga suportado sang United States samtang nga nagahingapos na ang termino ni US President Biden kag natalana ang pagbalik-pungko ni US President-elect Donald Trump.
Kun magmadinalag-on ang nakabutang sa kasugtanan, ginalauman nga mabuhin-buhinan ang tension nga subong naglapta na pati sa West Bank, sa Lebanon, Syria, Yemen kag Iraq, kag mangin ang isyu anay sang kahangawa sa all-out war sa tunga sang Israel kag Iran.
