Isa na ka semana nga malinong, wala sang gahod sang lupok kag wala sang may mabatyagan nga pagtay-og sa Kefar Sava, Israel.
Ini matapos nga ginkasugtan sang Israel kag Palestine nga magpatigayon sang ceasefire kasunod sang 11 ka adlaw nga pagbalusay sang lupok.
Suno kay Bombo International Correspondent Hanah Galotera direkta sa Israel, sadto, kada las 12 sang kaagahon, may mga nagalinupad pa nga rockets.
Apisar may yara sang iron dome ang Israel, indi kun kaisa malikawan nga may yara sang rocket nga nagatupa sa balay ukon sa buildings.
Nahibaluan nga naglab-ot sa masobra 240 ang patay sa Gaza tuga sang airstrikes sang Israel samtang 12 naman ang napatay sa Israel bangud sa rockets nga ginpangbuy-an sang Hamas.
Sa subong, ginatinguhaan sang Gazans nga mabalik sa normal ang ila pagpangabuhi sa diin nag-umpisa na ang mga otoridad sa pagpanagtag sang tents sa Gaza Strip.
