Naglunsyar ang Israel sang panibag-o nga mga pag-atake sa Lebanon kag Iran sa ikapito nga adlaw ukon isa na ka semana sang gyera sa Middle East.
Ini ginkumpirmar sang Israeli Defense Forces (IDF) kahapon nga adlaw nga nagpatigayon sila sang lapnagon nga serye sang airstrikes sa capital sang Lebanon nga Beirut nga nagtarget sa mga lugar nga ginakabig base sang Hezbollah.
Lakip sa gin-atake amo ang mga command center kag pila ka panalgan sang mga building sa kapital, pati man ang pasilidad kun sa diin ginapamutang ang mga drone sang militante nga grupo nga ila ginagamit sa mga pag-atake batok sa mga tropa kag estado sang Israel.
Suno sa Israeli Defense Forces, nagalab-ot na sa 26 ka serye sang strikes ang ila ginlunsyar sa Dahiyeh area sang Lebanon nga kadam-an sang nagaestar amo ang mga Shia Muslim.
Ginatan-aw man sang Israel ang amo nga lugar bilang isa ka balwarte ukon kuta sang Hezbollah.
Bangod sini, nagsaka pa ang numero sang napatay sa mga pag-atake sang Israel sa Lebanon sini nga semana sa 123 ka tawo samtang 683 naman ang nasamaran, base sa datos sang Lebanese Ministry of Public Health.
Base man sa report sang Iranian state media, naglab-ot na sa 1,045 ang kabug-usan nga numero sang mga napatay sa Iran halin sang ginlunsyar ang joint attack sang Israel kag Estados Unidos.
