ILOILO CITY – Nagaplano ang mga investors nagikan sa Israel nga maga-venture sa information kag communications technology, agriculture kag water sector sang Pilipinas kasunod sa nakita nga opurtunidad sa naga-amat amat na nga pagbalik sang ekonomiya bangud sang pandemya.
Suno kay Israel ambassador to the Philippines Ilan Fluss, ang mobile, telecommunication kag cybersecurity ang pinaka-aktibo nga areas of cooperation sa tunga sang duha ka pungsod sa nagligad nga mga dekada.
Dugang pa niya, ang duha ka major telecommunication companies sa Pilipinas ang nagatrabaho subong nga nagagamit sang Israeli technologies sa network optimization, 5G kag cybersecurity.
Suno pa sa iya, tatlo na ka importante nga mga agreements sa investments ang ginpirmahan sa tunga sang duha ka mga pungsod humalin sang nagbisita si anay presidente Rodrigo Duterte sa Israel in 2018.
Ginapanan-aw nila nga mag-promote sang dugang nga pala-abuton nga trade mission subong nga bulan nga maga-focus sa pagpanguma kag sa agriculture sector.
Nagaplano sila sang isa pa sa bulan sang Nobyembre nga maga-focus sa water sector.
