Gingamit sang Philippine Army ang Sabrah light tanks kadungan sang live fire phase sang Combined Arms Training Exercise nga “Katihan” sa Capas, Tarlac.
Ini nga light tanks nga human sa Israel ang armado sang 105 mm cannons.
Pormal ini nga ginbaton sang Philippine Army sang nagligad nga tuig, kag parte sang Horizon 2 sang modernization program sang Armed Forces of the Philippines (AFP).
Ang iban pa nga major assets sang army nga gingamit kadungan sang exercise amo ang ATMOS 105 mm Howitzers, kag ang 81 mm kag 60 mm mortars.
Ini nga live fire drills ang nagatuyo nga matilawan ang kapasidad sang Army sa combined arms operations.
“A combined arms live fire exercise is where we schedule all the indirect fire and direct fire weapons prior to the assault. So, as part of the overarching scenario before the infantry assaults objective, we subject the targets to both indirect and direct fire —it’s a combination of artillery, mortars and guns from our tanks,” suno kay Brig. Gen. Michael Logico, CATEX Katihan exercise director.
Ginalauman man nga ini nga drills ang makadugang pa sa pagpanghanda sang Army nga batuan ang mga pamahog kag paayuhon pa gid ang precision kag tactical proficiency sang nanuhay-tuhay nga units.
Ang CATEX Katihan ang kabahin man sang preparasyon sa partisipasyon sang Army sa Salaknib Exercise kaupod sa US Army amo man sa Balikatan Exercise nga tuigan nga ginahimo sang armadong kusog sang Pilipinas kag Estados Unidos sang Amerika.
Ang Balikatan subong nga tuig ang magalakip sang full-scale battle test kag maritime strike exercise kun sa diin palugdangon sang tropa sang Pilipinas kag America ang barko nga amo ang naga-representar sang pwersa sang kasumpong.
Sang nagligad nga tuig, ang ginpalugdang amo ang “made in China” nga barko nga BRP Lake Caliraya sa Laoag City sa Ilocos Norte.
