Ginalantaw sang Department of Education (DEPED) Schools Division of Iloilo nga ang mga issues nga gin-raise ni Senate President Pro Tempore Jinggoy Estrada ang gina-address na sang talapan.
Ini kasunod man sa pagduso sang senador nga pagdula sang mandatory Senior High School (SHS) level sa K to 12 program.
Sa interview sang Bombo Radyo kay Leonil Salvilla, spokesperson sang Department of Education Schools Division of Iloilo, iya ginpahayag nga sa Iloilo, may yara na sang 13 ka mga eskwelahan nga magasugod sa pilot run sang revised Senior High School (SHS) curriculum sang basic education program subong nga School Year 2025-2026.
Suno kay Salvilla, sige-sige ang pagsinapol agud nga mapatuman ang implementasyon sa masunod nga school year sa masobra 170 nga secondary schools sa Iloilo.
Dugang sini nga isa sa mga key features sang bag-o nga kurikulum amo ang pagbuhin sang mga panguna nga mga subject gikan sa 15 nga ginatanyag kada semester, pakadto sa lima lamang nga igatanyag sa bug-os nga tuig sa Grade 11.
Ining lima ka bag-o nga mga subject amo ang: Effective Communication (Mabisang Komunikasyon), Life Skills, General Mathematics, General Science, and Pag-aaral ng Kasaysayan kag Lipunang Pilipino.
Nahibaluan nga ang apat nga strands sang-una sa Senior High School, mahimo na lang subong nga duha ka tracks.
