GENERAL SANTOS CITY – Ginpaarakan luthang sang mga ginapahayag armado nga mga kalalakihan sakay sa pula nga pick up ang istasyon sang Bombo Radyo Gensan sa Barangay Bula, General Santos City.
Suno kay Bombo Jonathan “Janjan” Macailing, station manager sang Bombo Radyo Gensan, maswerte nga wala sang may na-igo nga personnel sang istasyon bangud nagdiretso ang lupok sa mismo recording room sa diin wala sang tawo.
Antes pa man na-tiruhan ang recording room, una na nga na-igo ang main door sang istasyon.
Ginapahayag nagdangat sa indi magnubo sa walo ka lupok ang nabatian sang gwardya.
Dugang pa ni Bombo Janjan, gintinguhaan pa sang gwardya nga makabalos sang lupok sa mga armado nga kalalakihan apang madasig ang mga ini nga nakapalagyo sakay sa pick up.
Samtang sa bahin naman ni Bombo Salvador “Boy” Galano, News Director sang Bombo Radyo GenSan, iya ginpahayag nga dako ang posibilidad nga may yara sang nakakita sa insidente sa guwa sang istasyon gani nagapanawagan ang Bombo Radyo Gensan nga kun mahimo makig-angot sa mga otoridad kag sa istasyon.
Nagalaum man ang Bombo Radyo Gensan nga makakuha sang Closed Circuit Television (CCTV) footage agud mahibaluan ang mga tawo nga sakay sang pick up.
Narekober naman sang mga kapulisan ang anom ka empty shells nga gina-alegar iya sang 9mm caliber kag .45 caliber.
Padayon naman ang imbestigasyon sang mga kapulisan sa motibo sa nasambit nga insidente.
