Ginkumpirma sang presidente sang League of Municipalities of the Philippines (LMP) Iloilo Chapter nga napahapyawan ang istorya-pulitika kadungan sang pagtilipon sang mga Ilonggo mayors kag mga kongresista sa Metro Manila.
Sa interview kay Badiangan Mayor Atty. Suzette Mamon, iya ginpahayag nga natabo ini kadungan sang simple nga panyapon sang mga alkalde pagkatapos sang LMP General Assembly sang Marso 8 tubtub 11.
Yara man sa amo nga event sanday Uswag Ilonggo Partylist Rep. Jojo Ang; 3rd district Rep. Lorenz “Noy” Defensor; 4th district Rep. Ferjenel Biron; kag 2nd District Rep. Kathy Gorriceta kag iya bana nga si former 2nd district Rep. Mike Gorriceta.
Nahatagan sang tyempo ang mga kongresista nga mag-deliver sang mensahe kag nangin sentro sang panawagan suno kay Mamon ang paghugpong sang tanan sa probinsya.
Sa mensahe naman ni Biron, gintawag sini si Representative Defensor nga “masunod nga gobernador” sang probinsya.
“Si Cong. Ferj naman ya, if he states it as it is, we take it also as face value nga amo ni ang ginhambal ya. And all the mayors man daw na-appreciate man ang amo to nga statement ni Congressman Biron,” suno kay Mamon sang ginpamangkot kun paano nila na-interpret ang amo nga pahayag ni Biron.
Dugang sini: “We respect him [Congressman Biron] so much as congressman, as leader… talalupangdon, isa man sa pillars sang mga lideres sa Iloilo, mapag-on nga haligi indi lang sa pamulitika kundi sa governance man. We have very high regard for Congressman Biron.”
Ginakabig man ni Mamon nga isa ka “welcome message” sa ila bilang mga alkalde ang nangin deklarasyon ni Biron.
Ginpabutyag man sini ang gusto sang mga alkalde nga masustiner ang maayo nga working relations kag pang-gobyerno sa mga kabanwahanan.
Wala sang nahatag nga reaksyon si Defensor sa amo nga “deklarasyon” ni Biron. Pahayag ni Mamon, mas nauna nga nakahatag sang mensahe ang 3rd district representative antes pa man ang kongresista sang 4th district.
Nahibaluan nga ang kandidato sa pagka-gobernador ang isa sa ginabantayan sa 2028 elections matapos nga na-secure ni Iloilo Governor Arthur “Toto” Defensor Jr. ang iya third and final consecutive term sang May 2025 elections.#
