Pabor ang isa ka transport group sa syudad sang Iloilo nga istriktuhan pa sang mga compliance officers ang pagpanaway kag pagpangmulta sa mga pasahero nga wala nagasunod sa minimum health protocols batok sa COVID-19.
Sa interview sang Bombo Radyo kay Raymundo ‘Boyet’ Parcon, presidente sang Iloilo City Loop Alliance of Jeepney Operators and Drivers’ Association (ICLAJODA), iya ginpahayag nga sa subong, daw nagakalipat na ang mga pasahero sa pagsuksok sang face mask kag face shield.
May yara man nga ginasaway sang driver sang jeep apang wala nagapati suno kay Parcon.
Magluwas diri, nagpahanumdom man si Parcon nga ginadumilian ang pagkaon, pag-inom, kag pag-istorya sa cellphone kun ara sa sulod sang pampubliko nga salakyan.
Ginpahayag man ni Parcon nga kun maka-isyu na sang ticket ang compliance officers, pat-od gid nga may yara sang monetary penalty kag community service para sa mga protocol violators.
Sa interview naman sang Bombo Radyo kay Jeck Conlu, COVID-19 spokesperson sang syudad kag pinuno sang Public Safety and Transportation Management Office (PSTMO), iya ginpahayag nga mas ginapasangkad pa nila subong ang pag-random check sa mga salakyan.
Para sa salawayon nga pasahero, P1,000 ang multa sa first offense; P3,000 sa second offense; P5,000 sa third offense; kag community service para sa iban nga indi makabayad sang multa.
May salabton man ang driver kag ang operators sang public utility vehicles suno kay Conlu.
Magluwas sa mga pagpasaway sa mga jeep, may mga nabaton man nga report nga may mga taxi drivers man nga wala nagasuksok sang nagakaigu nga tabon sa nawong.
Magluwas sa compliance officers, may citation tickets naman nga naisyu sa Philippine National Police kag Highway Patrol Group gani mahimo man sila makabulig sa pagpangsaway.
Ang mas masakit suno kay Conlu amo ang pagpanakop sang Land Transportation Office kag Land Transporatation Franchising and Regulatory Board bangud sa daku nga multa nga santo man sa ila guidelines.
