Hugot nga ginapamatukan sang Iloilo State University of Fisheries Science and Technology ang ruling sang Supreme Court nga nagapahanugot sa commercial fishers nga magpangisda sa municipal waters.
Kaupod sang unibersidad sa amo nga panindugan ang mga institusyon, komunidad, mga Non- Government Organizations, kag mga Local Government Units.
Sa interview sang Bombo Radyo kay Dr. Rolindo Demo-os, dean sang College of Fisheries and Aquatic Sciences sang amo nga unibersidad, iya ginpahayag nga ang nasambit nga ruling ang nagalapas sa Republic Act 8550, nga gin-amyendaran sang RA 10654, nga nagadumili sa commercial fishing vessels sa municipal waters nga amo ang ginasaligan sang mga ordinaryo nga manugpangisda para sa ila palangitan-an.
Suno kay Demo-os, ang pagpakigbato nga ipabilin ang status quo sa pagpatuman sang nasambit nga layi ang indi lamang para sa pagprotekta sa fish stocks kundi para man sa pagpreserba sang sustainability kag palangitan-an sang mga tawo nagasandig lang sa marine resources.
Gin-angot sini ang isyu sa overfishing sa Pilipinas nga yara na sa kritikal nga lebel kun sa diin 64% sa kadagatan ang nagaeksperyensiya sang overfishing bangud sa commercial fishing.
Gintumod sini ang report sang Bureau of Fisheries and Aquatic Resources sang 2017 nga ang mga major fishing areas ang overexploited kag ang stock sang isda ang nabudlayan nga magpadamo.
Pahayag niya, ang pagpasugot sa commercial vessels nga makasulod sa municipal waters ang magapalala lang sang problema ilabi na sa sustainability sang r marine resources.
Suno naman kay Professor Rother Gaudiel, faculty sang nasambit nga kolehiyo, dako ang epekto sang amo nga Supreme Court ruling sa isyu sang social justice para sa small-scale fishers bangud mabudlayan sila sa pag-kompetensya batok sa mga commercial vessels nga nagagamit sang dalagko nga sakayan kag advanced gear.
Dugang niya, may dala man nga environmental risks ang commercial fishing bangud nga sarang sini maguba ang coral reefs, seagrass beds, kag iban nga marine habitats.
Pahayag niya, ini ang pila lamang sa mabug-at nga mga rason kun ngaa nagapanagawan sila sang suporta agud ipalab-ot sa gobyerno nga tungdan ang ila commitment para sa environmental protection kag social justice paagi sa pagdumili sa commercial fishers nga magsulod sa mga municipal waters.
