Ginalantaw sang isa ka legal expert nga posible nga ang Supreme Court of the Philippines sa gihapon ang magahatag sang pinal nga interpretasyon sa isyu kun kinahanglanon gid man ang 16 ka boto sang mga senador agud ma-convict si Vice Presidente Sara Duterte sa impeachment trial.
Sa interview sang Bombo Radyo kay Atty. Jobert Pahilga, isa ka human rights lawyer, iya ginpahayag nga apisat maathag nga nakasaad sa Konstitusyon nga kinahanglan ang boto sang two-thirds sang tanan nga miyembro sang Senado agud makahimo sang conviction, nagapabilin nga bukas ini sa nagkalain-lain nga interpretasyon sa mga tinaga nga “all the members of the Senate.”
Suno kay Pahilga, kun sundon ang literal nga probisyon sang Konstitusyon, ang kabilugan nga numero sang mga senador amo ang 24 gani 16 ka boto ang kinahanglan agud mapamatbatan ang isa ka opisyal sa impeachment.
Apang ginsiling ni Pahilga nga may mga constitutional experts nga nagaduso sang iban nga interpretasyon nga ang pag-isip sang two-thirds vote amo ang mga senador lamang nga wala sang legal nga upang sa pag-intra kag pagboto sa impeachment proceedings.
Bangud sini, ginpahayag ni Pahilga nga isa ini ka isyu nga konstitusyonal nga mahimo maglab-ot sa Korte Suprema nga amo ang may gahom nga maghatag sang pinal nga interpretasyon sa mga probisyon sang Konstitusyon sa tion nga pormal nga mapasaka sa pinakamataas nga hukmanan ang nasambit nga isyu.
