Nagalaom ang Social Action Center sang Archdiocese of Jaro nga malakip sa State of the Nation Address (SONA) ni President Ferdinand Marcos, Jr. ang isyu sa flood control ilabi na subong nga madamo nga areas ang nalubog sa tubig-baha bangud sang habagat kag sunod-sunod nga mga bagyo.
Sa interview sang Bombo Radyo kay Msgr. Meliton Oso, director sang Jaro Archdiocesan Social Action Center (JASAC), ginpahayag sini nga makatilingala kun sa diin nagkadto ang tuman ka dako nga pundo nga para ma-kontrol ang pagbaha.
Kun masobra sa P1-trillion ang budget suno kay Oso apang padayon gihapon ang flash floods, nagaguwa ang mga pamangkot kun may nagkurakot sang pondo.
Nahibaluan nga sa sulod sang 15 ka tuig ukon halin sang 2011 tubtub sang 2025, nag-alokar ang gobyerno sang P1.47 trillion para sa flood control kag mitigation programs.
Subong nga 2025, nagbaton ang Department of Public Works and Highways sang ikaduha sa pinakadako nga budget allocation nga lab-ot sa P1.007 trillion.
Sang 2021 report naman, nagpahayag anay ang Department of Justice nga ang DPWH kag local government units amo ang may pinakamataas nga corruption complaints sa tanan nga government agencies.
Nahibaluan nga sang nagligad nga semana, halos nag-anaw ang Metro Manila kag madamo nga mga rehiyon sa pungsod bangud sang pag-ulan dala sang enhanced southwest monsoon kag Bagyo Crising, Bagyo Dante, kag Bagyo Emong.
