ILOILO CITY- Mas nag-init pa ang kontrobersiya sa syudad sang Iloilo sa ginapahayag sex for sale sa sulod sang Iloilo Terminal Market nga isa ka pinakadako nga merkado sa syudad.
Sa interview sang Bombo Radyo kay Mr. Eric San Agustin, market in charge sa nasambit nga merkado, iya ginpahayag nga indi matuod nga may mga minor de edad nga ginabugaw sa sulod sang merkado kag ginahimo nga motel ang mga stockrom sang stalls sa balor nga P200.
Suno kay San Agustin, ginapanginwala man sang mga nagapanag-iya sang stalls nga may yara sang imoralidad nga nagakatabo.
Ginhangkat naman ni Agustin ang pinuno sang Task Force Moral and Values Formation nga si Mr. Nestor Canong nga pamatud-an ang iya alegasyon nga ginagamit bilang sex den ang palahuwayan sang mga manugbaligya sa ila tagsa ka stalls.
Una na ginpahayag ni Canong nga may yara siya sang ebidensya nga makapamatuod nga may sex for sale sa Iloilo Terminal Market.
Samtang ginpahayag naman sang spokesperson sang Iloilo Terminal Market Vendors nga si Punong Barangay Woody Delariarte nga mabudlay sakaan sang mga kabataan ang palahuwayan sang mga vendors.
Magluwas sa mabudlay sakaan suno kay Delariarte, mahigko pa ang mga ini.
24 hours naman suno sa iya nga may mga tawo sa merkado kag wala sang posibilidad nga mangin sex den ang merkado.
Wala man sang problema suno sa iya kun ipaguba ang mga palahuwayan sang mga vendors. Ginpahayag naman ni Mr. Gerardo Rojo, enforcer sang Local Economic Enterprise Office nga igademolish nila kaupod ang Anti Squatting and Illegal Structures Unit ang mga palahuwayan sang mga vendors.
Ini agud mahawanan na ang merkado kag mauntat naman ang isyu.
Suno naman kay Edwin, isa sa mga manugbaligya sa nasambit nga merkado, wala sang mga kabataan nga nagapatigayun sang imoralidad sa iya baligyaan.
Nagaserbe naman suno sa iya nga bulutangan sang mga kagamitan sa iya apahan ang papag sa ibabaw sang iya baligyaan.
Wala naman suno sa natungdan sang iban nga tawo nga nagasaka sa papag sa iya kiosko magluwas lang sa iya.
