ILOILO – Indi na magpahilabot ang Police Regional Office (PRO) VI sa imbestigasyon may kaangtanan sa kamatayon sang police asset nga si Police Corporal Felfranz Lumahang sa Barangay Abilay Sur, Oton, Iloilo.
Sa interview sang Bombo Radyo kay PBGen. Rolando Miranda, bag-o nga director sang PRO VI, iya ginpahayag nga may yara na sang Special Investigation Task Group nga gintukod ang Iloilo Police Provincial Office (IPPO) nga amo ang magatutok sa kontrobersyal nga kaso.
Ginpahayag pa ni Miranda nga base sa report nga napasa na sa Camp Crame, SOLVED na ang kaso.
“Ayaw kung pakialaman kasi it is not during my time. It is during the time of PBGen Pamuspusan at syempre mayroon na silang report and investigation. Kung ano ang ginawa nilang report and isinubmit nila sa Crame, then it’s done. Hindi naman pwedeng baguhin. Ang sa akin kasi, kung ano ang inabutan ko dito… kung sa panahon ko, ako ang mananagot. Kung sa panahon ng iba, hindi ko kayang sagutin,” pahayag ni Miranda.
Matandaan nga una na nga nag-apelar ang pamilya ni Lumahang nga kuntani, padalman kag padasigon pa ang pagpatigayon sang imbestigasyon bangud tubtub subong, blangko gihapon sila kun ngaa ginpatay ang ila nga utod.
Nobyembre 28 natabo ang krimen kun sa diin santo sa spot report sang IPPO, ginluthang-patay si Lumahang sang suspek nga naga-angkas sa motorsiklo 3:15 sang hapon sang amo nga adlaw samtang ginaalegar nagahulat siya sa subject sa drug buy-bust operation.
Apang ini nga pahayag ang nangin kwestyonable matapos nahibaluan nga base sa rekord sang log book sa Iloilo Doctors Hospital kun sa diin gindala si Lumahang, 3:50 sa hapon nag-abot ang bangkay kag accidental firing ang ginapahayag nga rason sang mga nagdul-ong sa iya.
Wala sang nakasaksi sa krimen apang nagapanindugan ang IPPO nga “legitimate drug buy bust operation” ang gin-updan ni Lumahang sang natabo ang pagpangluthang.
Wala man sang pahayag tubtob subong ang Oton Municipal Police Station apisar gin-athag sang IPPO nga wala sang gag order nga ginpapanaug.
