Gin-ako nanday Gilas Coach Chot Reyes kag Team Captain Japeth Aguilar nga mabudlayan ang Pilipinas nga bantayan kag punggan ang Minnesota Timberwolves star nga si Karl-Anthony Towns sa pag-atubangay sang Pilipinas kag Dominican Republic karon sa gab-i.
Suno kay Reyes, posible nga bug-os nga team ang kinahanglan agud malutos si Towns nga isa sa best centers sa National Basketball Association (NBA).
“I don’t think it’s physically possible for any single person on our team or perhaps in the entire World Cup to stop Karl Anthony Towns 1-on-1 so it’s going to take a village to beat them,” suno kay Reyes.
Sang nagligad nga season, dalayawon ang performance ni Towns sa Minnesota nga nagkabig sa iya nga isa sa top-tier centers nga may 20.8 points kag 8.1 rebounds sa kada hampang.
Ika-23 ang Dominican Republic sa ranking sang FIBA nga mas mataas sa Pilipinas nga nagtupa sa pang-40.
Magluwas kay Towns, ang iban pa nga Dominicans nga may eksperyensya sa NBA ukon sa G League amo sanday Lester Quiñones (Golden State Warriors); Angel Delgado (Los Angeles Clippers); LJ Figueroa (Santa Cruz Warriors); kag Eloy Vargas (South Bay Lakers).
Ginpahayag naman ni Dominican Republic basketball coach Nestor Garcia nga mas daku ang ila pagpang-handa sa hampang batok sa Gilas Pilipinas ipaanggid sa iban nga kasumpong sa Group A nga amo ang Angola kag Italy.
Ini bangud magluwas nga imbukada nila nga hampang ang Gilas, pat-od nga mapuno man ang Philippine Arena sang Pinoy basketball fans nga magasuporta sa Gilas.
Balantayan las 8:00 karon sa gab-i ang group play sang Gilas batok sa Dominican Republic, pagkatapos sang Italy kag Angola nga maga-atubangay naman las 4:00 karon sa hapon.
Magapanguna sa Pilipinas ang Utah Jazz star nga si Jordan Clarkson nga buligan man sang iban nga Gilas players kaangay nanday Aguilar, Kai Sotto, Scottie Thompson, June Mar Fajardo, AJ Edu, kag Dwight Ramos. #
