Itlog diri, itlog didto.
Amo ini ang aton pirme ginasud-an, pinakamahapos dakpon kun nagadali nga makakaon, nagapanamit sang mga linuto, kag paborito man sang mga kabataan.
Apang nakahibalo ka bala nga may isa ka itlog nga nagabalor sang malapit na sa P15,000?
Indi abi ini kinaandan kag sa pagkamatuod ginatawag nga “one-in-a-billion egg.”
Ang una nga nangin tag-iya sini amo si Ed Pownell nga residente sang Lambourn, Berkshire, South East England.
Suno kay Ed, hubog siya sang nagtambong sa isa ka auction kag tubtub subong wala siya nakahibalo kun ngaa nagpatuga-tuga siya nga baklon ang itlog sa balor nga P11,193.30.
“I had a glass in the local down here in Lambourn and thought I’d pop in a bid,” suno kay Ed.
Antes ini nakakadto sa auction, nabakal ini sang isa ka babaye sa local supermarket sa Scotland sang June 2023.
Natingala gid abi ang babaye bangud perpekto gid ang pagkabilog sang itlog kag sang iya ini gin-research, natukiban niya nga isa lang ini sa isa ka bilyon. Wala niya ini ginluto kag sa baylo, gindala sa auction house nga Thomas Roddick Callan sang Agusto 2024.
Didto na kag nadag-an ini ni Ed kag apisar pa nga daw ka mahal gid sini, nangin proud owner siya sang perfectly-round egg bangud well-spent man suno sa iya ang iya kuwarta.
Gin-preserve na ini nga itlog, ginkakasan sang egg yolk kag egg white ukon buot silingon, shell na lang ang nabilin sa egg.
Ginpaminsar ni Ed ang potential market value sini kag nadumduman sini nga i-donate ini sa Iuventas Foundation nga isa ka charity para sa mentoring, life coaching, kag mental health support sa mga kabataan sa Oxfordshire.
Abi sang foundation “joke” lang ang itlog, apang sa bulig sang social media, naglapta ang istorya sini kag madamo ang nangin interesado.
Didto na kag nagdesisyon ang foundation nga ipa-auction ini. Didto nabakal ang itlog sang malapit P14,926 kag kabahin sang masobra P373,000 nga natipon sang foundation bangud sa iban pa nga items nga ila gin-upod sa auction.
Tuman ang kalipay sang mga nagabug-os sa foundation bangud sa isa lang ka itlog, madamo nga kabataan ang mabuligan ilabi na ang nagakinahanglan sang suporta sa mental health nga amo gid ang ginatutukan sang ila management.
