Wala ginarekomenda sang Department of Health (DOH) Region VI ang bulong nga Ivermectin agud gamiton sa mga pasyente nga may COVID-19.
Ini ang kasunod sang mga pagtuon nga ginhimo sang local experts may kaangtanan sa Ivermectin bilang bulong batok sa COVID-19.
Sa interview sang Bombo Radyo kay Dr. Mary Jane Juanico, pinuno sang Infectious Disease Cluster Unit sang DOH Region VI, iya ginpahayag nga santo sa Food and Drug Administration (FDA), wala pa sang may naka-rehistro nga Ivermectin drugs sa Pilipinas nga pwede gamiton sa tawo.
Suno kay Juanico, ang rehistrado pa lang nga Ivermectin sa pungsod amo ang โfor parasitic useโ sa diin ini ang para lamang sa mga kasapatan.
Pahayag ni Juanico, gina-abisuhan man nila ang publiko nga indi anay magamit sang nasambit nga bulong bangud ini ang yara pa lamang sa clinical trial kag wala man ginhatagan sang Emergency Use Authorization (EUA) sang FDA agud gamiton bilang bulong sa balatian nga COVID-19.
Samtang, una naman nga ginpahayag sang World Health Organization nga wala sa gihapon sang may nagakaigo nga ebidenysa nga pwede makabulong ukon makapalikaw sa COVID-19 ang Ivermectin sa isa ka tawo.
Nahibaluan nga ang Ivermectin ang isa ka anti-parasitic drug nga masami ginagamit bilang pangpurga.
May yara sang human grade Ivermectin kag veterinary-grade Ivermectin nga para lamang sa mga kasapatan.
