ILOILO – Nagbuhin sang halos katunga ang jail congestion sa Western Visayas.
Sa interview sang Bombo Radyo kay Jail Superintendent Gilbert Peremne, deputy regional director for administration sang Bureau of Jail Management and Penology 6, iya ginpahayag nga ang jail congestion sa subong nga tuig ang yara na lang sa 102% nga mas manubo sa 332% sang 2018.
Suno kay Peremne, nagtaas ang jail congestion umpisa sang ginpatuman ang oplan tokhang sang mga nakaligad nga mga tuig.
Ginpahayag ni Peremne nga ang pagnubo sang jail congestion ang tuga man sang plea bargaining nga ginahatag sa mga preso.
Magluwas diri, isa man sa rason amo ang madamo nga jail facility construction.
Kun tuhoy naman sa Good Conduct Time Allowance ang pagahambalan, ginpahayag sang natungdan nga nagapabilin sa gihapon sa Sablayan Penal and Prison Farm sa Occidental Mindoro ang ex-convicts nga nagsungka bangud nga nagapadayon sa gihapon ang validation sa ila record.
Isa man sa ginatutukan sa subong sang Bureau of Jail Management and Penology amo ang pagsaulog sang National Correctional Consciousness Week.
Samtang, nagdamu naman ang mga preso nga yara sa community-based corrections bangud sa plea bargaining.
Sa interview sang Bombo Radyo kay Edgar Leyson Jr., Senior Probation and Parole Officer sang Parole and Probation Administration, iya ginpahayag nga umpisa sang ginpahanugutan ang plea bargaining sa mga naulamid sa illegal drugs, nagdamu ang mga preso nga yara sa ila kustodiya.
Suno kay Leyson, ang personnel sa Parole and Probation Administration ang tama ka kulang kun ipaanggid sa numero sang mga preso nga yara sa community-based corrections apang may yara man sang mga volunteer nga nagabulig.
Ang plea bargaining suno kay Leyson ang isa ka kasugtanan sa tunga sang prosecutor kag defendant kabaylo sang mas manubo nga silot.
