ILOILO CITY – Ginrekomenda sang Regional Investigation Office sang Bureau of Jail Management and Penology (BJMP) ang pagpaska sang kaso administratibo sa jail warden sang Iloilo District Jail sa Nanga, Pototan, Iloilo nga si Supt. John Montero kag siyam ka iban pa nga BJMP personnel.
Ini matapos matukiban nga ginapahanugutan ang pagpasulod sa presuhan sang mga ginadumilian nga bagay kaangay sang cellphones kag iPod.
Suno kay Senior Jail Officer 3 Leo Lacerna, regional investigator sang BJMP Region 6, nag-ako man sa ila ginpatigayon nga imbestigasyon ang jail warden gani mahimo ini nga ma-suspend sang isa tubtob anom ka bulan.
Gin-athag ni Lacerna nga ang desisyon ang magahalin gihapon sa BJMP Central Office pagkatapos nila ginrekomenda ang pagpasaka sang administrative case.
Dugang pa ni Lacerna, lain pa nga kaso ang pagpasulod naman sang mga videoke machine kag video karera machines sa presuhan nga nakomitir sa idalom sang pagpamuno ni Montero.