Nag-resign sa pwesto si National Bureau of Investigation (NBI) director Jaime Santiago.
Sa iya sulat nga ginpadala kay President Ferdinand Marcos, Jr., ginsiling sini nga bayaan na sini ang posisyon kun may mahingadlan na nga indibidwal nga magabulos sa iya.
Ginpasalamatan ni Santiago si Marcos sa oportunidad nga pangunahan ang primary law enforcement arm sang Department of Justice.
Wala sini ginpatpat sa sulat ang mga sirkumstansya sa likod sang iya nga resignation, apang gin-claim sini nga gina-target siya sang mga mahigko nga mga akusasyon.
Nagsugod ini suno sa iya sang nagpasa siya sang courtesy resignation kaupod man sa iban nga government officials kasunod mismo sang mandu ni Marcos pagkatapos sang eleksyon.
Ginpahangop sini nga indi sini matugutan nga gub-on sang mga kabutigan ang reputasyon nga iya ginahuptan.
“Detractors and those who have sinister interest in my position incessantly make moves to blemish my reputation,” kabahin sang iya sulat. “To my mind, lies, if repeated overtime, will give a semblance of truth. I cannot allow this seemingly orchestrated move to blacken my reputation which I molded through the years.”
Isa si Santiago ka former police officer, nangin prosecutor, kag nangin retired Manila Regional Trial Court judge antes ini ginbutang ni Marcos sa NBI sang Hunyo 2024.
“With my experiences as a former police officer, prosecutor and judge, I steered the Bureau with my best leg forward— regaining the trust and confidence of the Filipino people (and) the media with the Bureau,” pahayag sini sa iya nga resignation letter.
Sa iya sulat, nagpasalig man si Santiago nga padayunon sini ang pagsuporta sa administrasyon.
Wala pa sang napaguwa nga komento ang Malacañang kaangot diri.#
