Magaupod ang Pinay volleyball star nga si Jaja Santiago sa training sang women’s volleyball team sang Japan samtang nga ginapreparahan ang Paris Olympics.
Base sa anunsyo sang Japanese Volleyball Association, lakip si Santiago kag ang Cuban spiker nga si Melissa Valdes sa original 24-woman training pool nga ginpili sang head coach nga si Masayoshi Manabe.
Nahibaluan nga pila ka tuig na halin sang gintanyagan ang nasambit nga 6-foot-5 Pinay middle blocker sang Japanese citizenship bangud sa iya dalayawon nga performance sa Japan V. League Division 1 apang sa subong, wala pa ini nahimo nga naturalized player.
Nag-umpisa ini sa paghampang sa Japan para sa Saitama Ageo Medics sang 2018 kag nag-upod sa amo nga squad tubtub sang 2023 samtang nga gina-tunga-tunga ang tyempo sini sa pagbulig man sa Premier Volleyball League sa Pilipinas.
Si Santiago ang kilala nga anay standout sa National University Lady Bulldogs kag isa sa finest players sa V.League kun sa diin nadag-an sini ang Best Spiker kag Best Blocker kag sulod man sa Best Six sang nagligad nga season.
Sa pihak nga bahin, pananglitan maka-qualify ang Japanese women’s volleyball team sa Olympics, ini na ang ila ika-anum nga sunod-sunod nga pagpasakop sa Olympiada.
