Ginapanawagan sang JALASIG Sugarcane Planters Association Incorporated nga mag-resign na lang sanday Department of Agriculture (DA) Secretary Francisco Tiu-Laurel Jr. kag Sugar Regulatory Administration (SRA) Administrator Pablo Luis Azcona, kon wala sila sang klaro nga solusyon sa problema sang sektor sang tubo.
Sa interview sang Bombo Radyo kanday Hernando Divinagracia Jr., presidente sang asosasyon, kag Rene Michael French, bise presidente, ginpahayag nila nga sobra na ang imported nga kalamay nga nagasulod sa pungsod, rason sang pagnubo sang presyo sang tubo halin ₱2,800 tubtob ₱2,900 sang nagligad nga tuig, pakadto ₱2,200 tubtob ₱2,250 subong.
Suno sa ila, indi sila kontra sa importasyon, pero dapat iregulate ini suno sa demand. Nagpadala na sila sang sulat sa Malacañang agud ipalab-ot ang panawagan.
Ginapangayo man nila ang transparency halin sa DA kag SRA, kag kun indi ini mahatag, mas maayo nga magpanaog na lang ang duha ka opisyal.
