CALINOG, ILOILO – Indi madali-dali nga maguba ang Jalaur Dam nga napahamtang sa Calinog, Iloilo.
Ini ang may kaangtanan sa kahangawa nga mahimo nga maguba ang dam sa tion nga magtay-og ang mabaskog nga linog ilabi pa nga isa ang nasambit nga banwa sa mga lugar nga yara sa Panay fault.
Sa interview sang Bombo Radyo kay Dr. Jerry Bionat, pinuno sang Provincial Disaster Risk Reduction and Management Office, iya ginpahayag nga bisan maghulag ang fault ukon ang duta, indi magguba ang dam bangud nga tuman ka damol ang pundasyon sini.
Suno kay Dr. Bionat, ang Jalaur dam ang indi kasubong sa mga dam sa Luzon nga tuman ka daku kag makatipon sang tuman man ka damu nga volume sang tubig.
Ginpahayag ni Dr. Bionat nga sa tion nga magtay-og ang linog, indi gilayon mag-awas ang tubig bangud nga may yara pa sang secondary kag tertiary dam nga mahimo magsalo sang tubig.
Antes pa man ipatukod ang dam, ginpahayag sang natungdan nga may yara na sang naplastar nga contingency plan agud nga minimal lamang ang matuga nga kahalitan sa tion sang emerhensya.
