ILOILO CITY- Nagakadapat nga indi matabo sa Iloilo ang malala nga pagbaha sa Luzon bangud sa pagrelease sang tubig sang Magat dam nga nag-utas sang madamo nga kabuhi.
Ini may kaangtanan sa ginatukod nga Jalaur Mega Dam project sa Calinog, Iloilo nga ginakabalak-an nga magtuga sang man sang kaangay nga anaw sa palaabuton.
Sa interview sang Bombo Radyo kay Iloilo 3rd District Board Member Matt Palabrica, iya ginpahayag nga samtang temprano pa, kinahanglan nga makahimo na sang tikang ang mga natungdan nga ahensya sang gobyerno kag Local Government Unit agud indi ma-eksperyensiyahan sang probinsya ang kalamidad nga natabo sa Luzon.
Suno kay Palabrica, paagi sa iya ginduso nga resolution, kinahanglan nga usisaon paagi sa paghiwat sang committee hearing nga pangunahan sang Committee on Disaster Risk Reduction and Management, kaupod ang Committee on Infrastructure kag Committee on Environment and Natural Resources, ang matuod nga estado sang dam kag kon may control measure nga nahanda ang National Irrigation Administration sa tion nga matabo ang kaangay nga sitwasyon.
Dugang pa ni Palabrica, pat-ud nga malumos gid sa tubig gikan sa dam ang madamo nga kabanwahanan sa probinsya kaangay sang Calinog, San Enrique, Dingle, Zarraga kag mangin ang Syudad sang Iloilo sa tion nga magrelease ini sang dako nga volume sang tubig gani kinahanglan nga mapreparahan na ini subong.
