15 ka tuig matapos ang iya pagpasakop sa Binibining Pilipinas, nagbalik sa pageantry ang kontrobersyal nga beauty queen nga si former Bb.Pilipinas – World Janina San Miguel.
Isa si Janina sa nag-audition para sa 2023 edition sang Mrs. Face of Tourism Philippines bangud luyag sini i-represent ang Pilipinas sa international pageant.
Espesyal ini nga pageant para sa married women kag single mothers agud nga ma-promote ang turismo sang pungsod.
Patigayunon ang koronasyon sang amo nga pageant sa Mayo subong nga tuig kag may yara sang lima ka titulo nga at stake.
Matandaan nga si Janina ang ginkoronahan nga Binibining Pilipinas World sang Binibining Pilipinas 2008 beauty pageant, apang nag-resign siya sang September 2008 bangud sa personal nga mga rason.
Kilala siya sa iya sabat sa interview portion kun sa diin ginabalik-balikan subong ang iya famous line nga “I don’t feel any pressure right now” kag ang mas popular nga, “my Pamily… my Pamily… Oh my God. I’m… Ok. I’m so sorry.”
Apisar indi diretso kag ginkadlawan ang iya sabat sang amo nga tion, nakuha sini ang titulo sa edad lamang nga 17 anyos, ang pinakabataon nga kandidata sang amo nga tion. ##
