ILOILO – Naka-hospital arrest subong si Janiuay Iloilo Mayor-elect Frankie Locsin.
Ini matapos gin-aresto ini sang National Bureau of Investigation (NBI) bangud sa kaso ini nga pagalapas sa Anti-Graft and Corrupt Practices Act.
Sa exclusive interview sang Bombo Radyo Iloilo kay Atty. Jorge Jularbal, Regional Director sang NBI Region 6, iya ginpahayag nga nagkuha sang NBI clearance si Locsin, natukiban nga convicted ini sa nasambit nga kaso.
Suno kay Atty. Jularbal, nakibot ang alkalde bangud wala ini nagalaom nga arestuhon gilayon apisar may ginpapanaog na nga desisyon ang Sandiganbayan First Division sa diin convicted ini sa kaso nga graft.
Gintagaan naman sang Sandiganbayan sang kopya sang arrest warrant ang NBI.
Ginpahayag ni Atty. Jularbal, na ginkuhaan na sang mugshots ang alkalde.
Apang sang ginhambalan na ini nga dal-on sa Sandiganbayan, gulpi lang nagsakit ang iya dughan rason nga gindala ini sa hospital.
Natukiban man nga may balatian ini sa dughan kag may pneumonia.
Sa subong, nagapabilin sa The Medical City ang alkalde kag ginabantayan sang mga katapo sang NBI.
Matandaan nag-ugat ang kaso bangud sa pagbakal sang banwa sang Janiuay sang P15 million nga balor sang bulong halin sa Priority Development Assistance Fund ni Sen. Vicente Sotto III sang tuig 2001.
Ang medical supply contract ang gin-award sa AM Europharma, sa diin ang ila accreditation ang ginsuspend sang Department of Health (DOH).
Magluwas kay Locsin gin-convict man sang Sandiganbayan sanday municipal accountant Carlos Moreno Jr., budget officer Ramon Tirador, treasurer Luzviminda Figueroa, Ricardo Minurtio, kag Rodrigo Villanueva.
Ginpamatbatan man sang anti-graft court ang mga natungdan sang anom tubtub 10 ka tuig nga pagka preso kag ginpapanaugan sang perpetual disqualification from public office.
