JANIUAY, ILOILO – Nagpaathag si Janiuay Iloilo Mayor Bienvenido Margarico may kaangtanan sa nakuha nga rating sa pagpatigayon sang road clearing operation.
Nakakuha sang 80% nga rating ukon low compliance ang banwa sang Janiuay santu man sa validation sang Department of Interior and Local Government.
Sa interview sang Bombo Radyo kay Mayor Bienvenido Margarico, iya ginpahayag nga pipila ka mga rason nga iya ginalantaw kun ngaa nangin low compliance ang banwa amo ang mga barangay hall nga indi gilayon maguba bangud wala pa sang masaylohan kag minilyon man ang gingasto sini sa pagpatukod.
Gintumod man sang alkalde ang Barangay Jibolo nga madamo sang mga vendors nga nagabaligya sa kilid sang dalan.
Suno kay Margarico, ang mga vendors ang nagatuga sang pagpugok sang trapiko bangud sa paggutok sang lugar.
Sa subong nagapanawagan ang alkalde sa mga punong barangay sa nasambit nga banwa nga magbuliganay agud nga mangin high compliance ang banwa sa ila nga pagpadayon sang road clearing operations.
