Ginkaakig sang alkalde sang Janiuay, Iloilo nga si Mayor Paulino Parian ang natabo nga pagpangbuka sang 16 ka mga takop sa suga sang ila nga plaza.
Suno kay Parian matapos ma-review ang CCTV sa plaza, ila nadiskobrehan nga mga menor-de-edad ang mga nagpangbuka.
Ginmanduan naman sini ang mga awtoridad nga imbestigaran ang natabo agud mahibaluan ang mga pangalan sang mga indibidwal nga involved sa paghimo sang nasambit nga akto.
Ginkadismaya man sini ang pagpang-guba sang mga gamit bangud kanugon lamang ang gingasto agud nga mapatukod ang nasambit nga proyekto sa ila nga banwa.
Pahayag pa sang alcalde nga kun mga job-hire sa ila nga Local Government Units ang mga ginkanan sang mga menor de edad, gilayon sini nga e-terminate ini.
Dugang pa sini nga ila ginatingwaan nga mapanami ang plaza sang ila nga banwa apang ginahalitan lamang sang mga tawo nga wala sang maayo nga kontribusyon.
Nagapanawagan man ini sa ginikanan nga i-monitor ang ila mga kabataan agud nga indi makapanghalit sa mga proyekto nga ginatukod sa ila banwa.
