Gin-ako ni Janiuay Sangguniang Bayan Member Atty. Mayen Mar Gulmatico nga ginkakibot niya ang pagtudlo-tudlo sa iya ni Municipal Disaster Risk Reduction and Management Office-OIC Jojo De Paula.
Ini kasunod man sang ila pagsabtanay sa ginpatigayon nga budget hearing para sa Fiscal Year 2025 sang Janiuay.
Sa interview sang Bombo Radyo kay Atty. Gulmatico, iya ginpahayag nga posible na-trigger gid si De Paula sa iya nangin pamangkot rason nga nagsaligbat ini samtang nagapadayona ang hearing.
Ginpanginwala man sini nga ginapulitika niya ang budget hearing bangud masami na niya nga ginapamangkot ang mga palamangkutanon kon may budget hearing.
Suno kay Gulmatico, bilang parte sang legislative body, kinamatarong niya nga magpamangkot kag i-representar ang mga tawo.
Gin-athag man sini nga nagsiling pa siya kay de Paula nga hulaton ang iya nga turno antes nga magsabat kon sa diin, makapila man ka beses nga ginsaway ni Vice Mayor Corel Hannah Locsin-Yap.
Sang ulihe, gin-declare ni SB Member James Adelantar nga out of order si De Paula kag ginpaboran ini sang mga kaupdanan niya nga konsehal.
