JANIUAY, ILOILO – Nagpirma na sang kontrata ang tatlo ka mga water company agud nga mapasanyog ang water distribution sa Janiuay, Iloilo.
Natigayon subong nga adlaw ang joint venture agreement sa tunga sang Citicore Power Corporation, Summa Water Resources, Inc. kag Janiuay Water District.
Sa interview sang Bombo Radyo kay Kristyn Nika Lazo, corporate communications officer sang Citicore Power Corporation, iya ginpahayag nga katuyu-an sang joint venture agreement amo nga mahatagan sang maayo nga water service ang mga pumuluyo sang Janiuay, Iloilo.
Isa sa mga rason kun nga-a dapat nga buligan sang duha ka kompaniya ang Janiuay Water District suno kay Lazo amo nga maiwat ang water distribution kag ang kakulang sang potable water ukon mainom nga tubig sa nasambit nga banwa.
Gin-athag naman ni Lazo nga wala sang may matabo nga take-over bangud nga magabulig lang ang Citicore Power Corporation kag ang Summa Water Resources, Inc. sa Janiuay Water District.
Ginabanta nga matapos ang pag-ilis sa mga guba nga pipelines sa sulod sang isa ka tuig samtang duha tubtub tatlo naman ka bulan ang gintalana nga transition period sa pagdumala sa water distribution.
May yara man sang tentative schedule sa pagpatigayon sang ground breaking ceremony suno kay Lazo kag ini ang mahimo nga matigayon sa sulod sang duha ka bulan.
