Mas nagdaku pa ang tyansa nga maka-abanse sa Paris Olympics ang Filipino Southeast Asian Games gold medalist kag national record holder nga si Janry Ubas matapos nagkampyon sa men’s long jump sa Singapore Open Track and Field Championships.
Si Ubas nga tumandok sang Misamis Oriental ang naka-rehistro sang 7.58 meters nga amo ang nagpangibabaw sa event samtang silver winner naman ang tiglawas sang Chinese Taipei nga si Wen Hua-Yu nga may 7.43 meters.
Bangud sini, nadugangan ang ranking points sang 30-anyos nga Pinoy pride para makatapak sa labing-una nga tion sa Olympiada.
Kinahanglan pa sini nga lapawan ang 8.27m nga qualifying standard ukon kinahanglan nga makasulod sa top 32.
Nagapang-40 ini subong nga may 1162 points ukon eight spots pa ang kalayuon sa ika-32 sa world rankings.
Natalana man ini nga magpasakop sa Philippine Athletics Championships sa PhilSports Track and Field Oval sa Pasig City sa masunod nga bulan nga makabig nga isa ka World Athletics-sanctioned event.#
