ILOILO CITY-Untaton na sang Japan ang pag-import sang coal gikan sa Russia bilang pagpakita sang protesta sa lihok sang pungsod nga pag-atake kag pagpamatay sa mga inosente nga sibilyan sa Ukraine.
Ini magluwas pa sa pag-expel sang Japan sa walo ka mga Russian diplomats.
Suno kay Bombo International Correspondent Josel Palma direkta sa Japan, iya ginpahayag nga nagapanindugan si Prime Minister Fumio Kishida nga nagadampig ang Japan sa Ukraine kag ginakondena sini ang giyera nga ginlunsar ni Russian President Vladimir Putin.
Ginpahayag ni Palma nga sa subong, nagapangita na si trade minister Koichi Hagiuda sang alternatibo nga suppliers sang coal samtang amat-amat nga ginadula pag-import sini halin sa Russia.
Nahibaluan nga ang Russia ang nagabug-os sang 11% sang total coal imports sang Japan sang 2021 base sa government data.
Ang Russia amo ang fifth-biggest supplier sang Japan sang krudo kag liquefied natural gas (LNG) sang 2021.
Ang Japan naga-import sang halos tanan nga coal nga ginakonsumo sini gani ini ang third-largest importer kasunod sang India kag China base naman sa U.S. Energy Information Administration data.
