ILOILO CITY- Liwat nga ginpautang sang Japan ang Pilipinas agud may gamiton ang pungsod sa galastuhan para sa mas ginpalawig nga away batok sa COVID-19.
Ini nga utang ang nagalab-ot sa 30 billion yen ukon kapin P12.3 billion.
Ang kasugtanan sa loan ang ginpirmahan sa Tokyo ni Department of Finance Secretary Carlos Dominguez III.
Ini ang magasuporta sa emergency response sang gobyerno paagi sa pag-provide sang budget support nga iga-co-financed sang Asian Development Bank (ADB).
Suno kay Bombo International Correspondent Josel Palma direkta sa Japan, ini nga loan ang magabulig sa Pilipinas nga malab-ot ang tatlo ka mga goals sa idalom sang United Nations’ (UN) sustainable development goals (SDGs) nga amo ang ‘no poverty’, good health and well-being, kag decent work and economic growth.
Pahayag ni Palma, ang Japan ang nagapabilin nga biggest provider sang official development assistance (ODA) sang Pilipinas kag ang Japan International Cooperation Agency (Jica) amo ang masaligan nga partner sini sa pagpatuman sang mga priority programs sang Duterte Administration.
Nahibaluan nga naglab-ot na sa kabilugan nga 1 trillion yen nga financing ang naggikan sa Japan nga gin-gamit para sa “Build, Build, Build” program.
