Naangkon sang pungsod Japan ang pinakauna nga kadalag-an sa pagbukas sang hinampang sa 2020 Tokyo Olympics.
Suno kay Bombo Samurai International Correspondent Josel Palma direkta sa Japan, ginpatigayon sa Fukushima stadium ang women softball games sa diin ginlutos sang Japan ang pungsod Australia sa score nga 8-1.
Ang kadalag-an sang Japan ang bangud man sa pagpanguna sang gold medalist kag pitcher nga si Ueno Yukiko.
Nagtakop ang hampang matapos ang lima ka innings bangud sa mercy rule.
Bangud sa pamahog nga dala sang COVID-19, ginhiwat ang hampang nga wala sang spectators kag fans sa sulod sang Fukushima stadium.
