Nag-isyu ang Japan sang una nga warning sa posibilidad sang “megaquake” kasunod sang 7.1-magnitude nga linog nga nagtay-og sa southern coast sang pungsod.
4:42 kaina sang hapon sang natabo ang linog apang wala pa sang na-report nga daku nga mga kahalitan ukon seryoso nga injuries.
Sandig sa Japan Meteorological Agency, natabo ang pagtay-og sa coast sang Miyazaki Prefecture sa main island sang Kyushu.
Kun basehan ang statement ni Chief Cabinet Secretary Yoshimasa Hayashi, may tatlo ka mga tawo nga nasamaran apang wala sang nabaton nga impormasyon sang blackouts ukon halit sa water kag communications systems sa rehiyon.
Base naman sa kapulisan sa Miyazaki Prefecture, may 10 ka reports sang damage samtang sa Hayashi, gin-engganyo ang mga residente nga magpalayo anay sa baybayon.
Gilayon man nga nagpatawag sang emergency meeting ang mga opisyal agud nga maanalisar kun naapektuhan sang linog ang kaiping nga Nankai Trough. Gin-isyu ang “mega earthquake caution” kun sa diin na-assess nga mas mataas sa kinaandan ang posibilidad sang daku nga pagtay-og apang wala man nagakahulugan nga matabo gid ini gilayon.
Gin-abisuhan man ang mga residente nga magpabilin nga vigilante para sa masunod nga semana para makabakwit pananglitan matabo liwat ang linog.
Suno naman kay Bombo Josel Palma, international correspondent sa Japan, lakip sa ginhaylo nga maghalin anay sa coastal areas (tubtub nga ma-lift ang tsunami advisory) amo ang sa Kochi kag Miyazaki prefectures. Masami nga gina-isyu ang kaangay nga abiso kun ginalauman nga magasobra sa isa ka metro ang kataason sang tsunami waves.
Sa Pilipinas, ginklaro sang Phivolcs nga wala sang tsunami threat sa pungsod.
