Plano sang Japan kag Estados Unidos sang Amerika nga maghimo sang joint military plan para sa posible emerhensya nga matabo sa Taiwan nga teritoryo nga ginaangkon sang China.
Suno sa Kyodo news agency nga nakabase sa Japan, nalakip diri nga plano ang pag-deploy sang missiles.
Sa masunod nga semana pa iga-compile ang plano.
Base diri, magapadala ang Estados Unidos sang missile units sa Nansei Islands sa southwestern Kagoshima kag Okinawa prefectures sa Japan amo man sa Pilipinas.
Wala pa ginhingadlan sa report kun sin-o ang US kag Japanese sources kaangot sa sini nga plano.
Base sa Kyodo, ang Marine Littoral Regiment sang US Marine Corps nga may High Mobility Artillery Rocket Systems (HIMARS) kag iban pa nga weapons amo ang iga-deploy sa Nansei Islands.
Sa pihak nga bahin, ang iga-estasyon naman sa Pilipinas amo ang US unit nga para sa space, cyberspace kag electromagnetic waves.
Ginahulat pa kun ano ang mangin statement sang Japanese defense ministry kag mga embahada sang US kag Pilipinas sa Tokyo kaangot diri.
