Istoryahan nanday President Ferdinand Marcos Jr. kag Japanese Prime Minister Fumio Kishida ang mga isyu sa West Philippine Sea kadungan sang ila nga pagkit-anay subong nga adlaw.
Suno sa Malacañang, magatinir si Kishida diri sa Pilipinas subong nga Byernes tubtub buwas nga adlaw para sa bilateral meeting kay Marcos bilang kabahin sang iya nga official visit.
Ini nga meeting ang ginapanan-aw man nga magapabaskog sang relasyon sang duha ka pungsod sa aspeto sang pulitika, ekonomiya, seguridad, kag mangin ang pag-abyanay sang mga Pilipino kag Hapones.
Pahayag naman ni Senate Majority Leader Joel Villanueva, istoryahan sang duha ka lider ang Reciprocal Access Agreement nga amo ang maga-pahapos sang proseso kun sa diin madala sang Japan kag Pilipinas ang ila militar kag equipment sa pungsod sang kada isa.
Paagi sa sini nga kasugtanan, ginapanan-aw man nga mas mangin mahapos ang pagpatigayon sang joint drills.
Suno pa sa senador, ang pagbisita ni Kishida ang magahatag sang klaro nga senyales sa iban nga kaiping nga mga nasyon kun ano gid ang buot silingon sang “mag-kaalyado”.
Sa buwas, Nobyembre 4, may yara sang special joint session ang Kamara kag ang Senado kun sa diin imbitado si Kishida kag maga-deliver ini sang iya nga prime minister’s address sa 11:00 sa aga.
