ILOILO CITY- Nakarekord ang Japan sang pinakamataas nga temperatura sa sulod sang 126 ka tuig kadungan sang heatwave nga ginpalala pa sang climate change.
Suno kay Bombo Josel Palma, international correspondent sa Japan, ang pinakamataas nga temperatura ang narekord sa Shizuoka nga nangin pinakauna nga Japanese region nga naglab-ot sa 40 degrees Celsius (104 Fahrenheit) nga naglampas sa 35-degree threshold nga ginakabig nga pinakamainit.
Ginpahayag ni Palma nga base sa record, 1898 pa sang ulihi nga nakaeksperyensiya sang ini nga antad sang temperatura ang Japan base sa data sang Japan Meteorological Agency.
Pila sa mga contributing factors amo ang high-pressure system sa Pasipiko kag mainit nga hangin gikan sa nabagatnan nga bahin sang Japan.
Nahibaluan nga umpisa sang Abril, 59 ka tawo na ang napatay sa heatstroke sa Japan, suno sa disaster management agency.
