ILOILO CITY – Nangin matawhay ang selebrasyon sang pista ni Nuestra Señora de la Candelaria.
Sa interview sang Bombo Radyo kay Pol Lt. Col. Reuben Siason, hepe sang Jaro Police Station, iya ginpahayag nga ‘generally peaceful’ ang nangin assesment nila sa mga misa nga ginpatigayon sa Jaro Metropolitan Cathedral subong nga adlaw, Pebrero 2 kadungan sang pista.
Suno kay Siason, nag-umpisa las 5:00 tubtob las 10:00 sang aga ang pagdamo sang tawo subong nga adlaw sa Jaro Metropolitan Cathedral agud magtambong sang pila ka mga misa.
Ginabanta suno kay Siason 1,000 tubtob 3,000 ang numero sang mga tawo nga yara sa gwa kag sa sulod sang simbahan.
Gintuad ni Siason nga may yara sang mga tawo nga nagakalipat magtuman sa physical distancing apang wala man sila sang untat sa pagpangsaway kaupod ang compliance team sang COVID-19 sang Iloilo City Government.
Ginpahayag ni Siason nga may ara gid sang mga dungol nga tawo nga nagalapas sa health protocol sa diin ila man gin-isyuhan sang citation ticket.
Apang sa pihak sini suno sa natungdan, nangin matalunsay ang kahiwatan sa Jaro Fiesta.
Nagpanugyan man si Siason sa publiko nga padayon nga magsunod sa tanan nga mga health protocol agud malikawan ang COVID-19 virus.
