ILOILO CITY–Gina-usisa na sang Jaro PNP ang close circuit television (CCTV) footage sa Zone 4, Brgy. Ungka, Jaro, Iloilo City kun ano gid ang matuod nga natabo sa pagpatay sa tricycle driver nga ginapatihan drug surrenderee.
Sa interview sang Bombo Radyo kay PO3 Romanico Baron, imbestigador sang Jaro Police Station, iya ginpahayag nga luyag nila mahibalu-an ang identity sang mga suspetsado.
Dugang pa ni Baron, nakaangkon sang apat ka igo sa lawas, duha sa ulo kag duha sa butkon ang 25 anyos nga biktima nga si Gerardo Mamarion.
Pito naman ka basiyo sang bala kag apat ka slug sang ginapatihan calibre 45 ang nakita malapit sa bangkay.
Ginpahayag naman ni Baron nga “for registration” pa lang motorsiklo nga ginsakyan sang mga suspetsado.
Samtang, gin-athag sang amay sang tricycle driver nga wala sang kahilabtanan sa iligal nga druga ang iya bata.
Sa interview sang Bombo Radyo kay Gerry Mamarion, amay sang biktima nga si Gerardo Mamarion, iya ginpahayag nga wala sang kaangtanan sa iligal nga druga ang iya bata.
Ginpanindugan man sang amay nga indi drug surrenderee ang biktima.
Nagabyahe lang sang tricycle kun gab-i samtang nagapahuway ukon nagapanglaba ang biktima suno sa amay.