ILOILO CITY – Nagpatigayon sang conference ang Jaro PNP kaupod ang Bangko Sentral ng Pilipinas agud usisaon ang kaso sang nagalapta nga peke nga kwarta sa syudad sang Iloilo.
Madumduman nga sang damlag lang, nadakpan ang isa ka lalaki sa Brgy. San Isidro Jaro, Iloilo City nga ginkilala si Edmund Dela Torre nga may dala sang ginabanta P100,000 nga balor sang peke nga kwarta.
Sa interview sang Bombo Radyo kay Police Captain Eduardo Siacon Jr., hepe sang Jaro Police Station, iya ginpahayag nga nangin mabudlay ang ginapatigayon nga imbestigasyon bangud sa pagbag-o bag-o nga pahayag sang suspek.
Nahibaluan nga una na nga gin-ako ni Dela Torre nga yara sa P100,000 ang dala niya nga peke nga kwarta apang sa pagpadayon sang imbestigasyon, iya gin-ako nga balor P300,000 ang dala niya nga peke nga kwarta.
Sa pihak sini suno kay Siacon, isa lang ang mapat-ud niya kag ini amo nga may yara na sang nagalapta nga peke nga kwarta sa syudad sang Iloilo.
