Ginkumpirma sang Iloilo City Police Station 9 nga ang lalaki nga nagpangayo sang bulig sa Leganes, Iloilo kag ang nangawat sang motor sa Jaro ang isa lang.
Ini amo si Alyas Von, 40-anyos, residente sang Poblacion Zone III, Estancia, Iloilo.
Sa interview sang Bombo Radyo kay Police Captain Gimel Acuesta, hepe sang Iloilo City Police Station 9, iya gindepensa nga may mga pilas na nga daan ukon nakastigohan na si Alyas Von antes ini gin-turnover sa ila talatapan.
Suno kay Acuesta, wala nag-file sang kaso ang complainant batok kay Alyas Von rason nga nagdesisyon na lang sila nga i-release ini.
Gin-athag man sang natungdan nga gindul-ong pa sang kapulisan ang nangawat sang motor sa banwa sang Leganes bangud nagsiling ini nga sa amo siya nga lugar nagatinir.
Nagawaras naman si Alyas Von samtang sakay siya sang patrol rason nga gin-release na lang ini gilayon.
Liwat naman nga ginpanindugan ni Acuesta nga antes pa man gindala ang suspek sa ila talatapan, nakastigohan na ini bangud sa pagpang-agaw sang motor.
