𝗝𝗔𝗥𝗢, 𝗜𝗟𝗢𝗜𝗟𝗢 𝗖𝗜𝗧𝗬 — Ginasekyar na sang Jaro Police Station ang isa ka kopya sang closed circuit television ukon CCTV nga nakakuha sang mas maathag nga itsura sang suspek nga nagpatay sa isa ka myembro sang LGBTQIA+ sa Brgy. Our Lady of Lourdes, Jaro, Iloilo City.
Ang biktima amo si Victor “Vic” Lorca, Nurse V sang Center for Health Development – Western Visayas, kag tumandok sang Maasin, Iloilo.
Sa interview sang Bombo Radyo kay Police Captain Melchor Tolentino, Chief of Police sang Jaro Police Station, iya ginpahayag nga nag-deploy sila sang mga intelligence operatives sa Brgy. Our Lady of Lourdes, agud maglibot kag makakuha sang mga anggulo sang CCTV.
Suno kay Tolentino, nakakoordinar na sila sa isa ka establisyemento agud makakuha sang record sang CCTV nga nagapakita sang maathag nga nawong sang ginapahayag nga ulihi nakit-an nga nakaupod sang biktima antes ini nasapwan nga wala na sang kabuhi.
Ginpaidalum naman sa autopsy examination ang lawas sang biktima kag ginahulat na lang sang otoridad ang resulta.
Santo naman sa imbestigasyon sang kapulisan, kilala sang biktima ang suspek bangud naka-access ini sa kwarto sang biktima kag wala sang indikasyon nga ginpilit sudlon ang amo nga hulot.
Nagaguwa naman nga sa Brgy. Bolilao, Mandurriao kag Jalandoni Street, Jaro nga mga area ang posible ginpadulongan sang suspek.
