JARO ILOILO CITY– Ginatinguhaan sang Jaro Police Station nga magpakig-angot sa pamilya sang civilian agent nga ginluthang patay sa Brgy. Democracia Jaro Iloilo City.
Sa interview sang Bombo Radyo kay PCapt. Eduardo Siacon Jr., hepe sang Jaro Police Station, iya ginpahayag nga ginahulat pa nila nga makakadtop sa ila ang pamilya agud makapatigayun sang case discussion sa kamatayon sang biktima.
Suno kay Siacon, dako ang tyansa nga masolbar ang kaso bangud may yara sang mga cctv footages sa diin makit-an nga wala sang helmet kag mask ang mismo gunman nga nagtiro-patay kay Angel Ladimora.
Pahayag pa sang hepe nga may ginasundan na sila nga mga anggulo sa kamatayun sang biktima.
Dugang pa sang natungdan, luyag nila maistorya ang pamilya agud mapalab-ot man sa ila kun ano ang nadiskubrehan sang mga kapulisan sa ila imbestigasyon kag kun pareho man nga anggulo ang ginatan-aw sang pamilya sa kamatayon ni Ladimora.
