ILOILO CITY – Temporaryo nga ginsirado ang Jaro Small Market epektibo 5:30 kahapon sang hapon, Agosto 23.
Ini ang ginkumpirma sa Bombo Radyo ni Iloilo City Mayor Jerry Treñas kasunod sang pagtaas sang kaso sang COVID-19 sa Brgy. Simon Ledesma sa distrito sang Jaro.
Suno kay Treñas, magalawig sang tatlo ka adlaw ang lockdown agud hatagan sang ligwa ang pagpaninlo apang santo sa abiso sang Iloilo City Government, epektibo 6:00 subong nga aga maga-umpisa ang lockdown.
May kaangtanan naman sa Returning Overseas Filipinos sa syudad sang Iloilo, ginpahayag ni Treñas nga napangitaan na sang quarantine facility ang mga nagpauli nga Ilonggo.
Ginaduso sang alkalde sa Overseas Workers Welfare Administration nga gamiton nga quarantine facility ang mga beach resort kag hotel nga nahamtang sa probinsya sang Iloilo agud nga ma-akomodar ang tanan nga nagapauli.
