Ginkasubo ni Msgr. Melito Oso, director sang Jaro Archdiocesan Social Action Center (JASAC), ang pag-pirma ni Presidente Ferdinand Marcos Jr. sa layi nga nagapa-postpone sang 2026 Barangay kag Sangguniang Kabataan (SK) Elections.
Sa interview sang Bombo Radyo kay Msgr. Oso, iya ginpahayag nga bisan may pagkasubo sa postponement, may yara pa sa gihapon sang paglaum bangud sa petition nga gin-file ni Atty. Romulo Macalintal sa Supreme Court.
Suno kay Oso, nagahulat sila sa lihuk sang Supreme Court sa nasambit nga petition bangud ini ang ila ginatan-aw nga posibilidad para mapadayon ang eleksyon.
Pahayag niya, ang postponement sang eleksyon ang mahimo makaapekto sa kinamatarong sang mga botante nga makapili sang ila mga lider.
Ginpahayag man niya nga una na nga ginkawat sang gobyerno ang pondo para sa flood control projects, subong ang kinamatarong naman sang mga pumuluyo sa pagboto ang ila nga ginakuha.
Ginpakigbahin man ni Msgr. Oso, base sa pahayag ni COMELEC Chairman George Garcia, posible pa nga matigayon ang eleksyon sa Nobyembre kon magdesisyon ang Supreme Court pabor sa petition.
Dugang pa niya, padayon ang iya paglaum nga gilayon mahatag sang nagakaigo nga lihuk sang Supreme Court ang petition ni Atty. Macalintal agud mapadasig ang proseso kag posible gihapon nga matigayon ang eleksyon sa Nobyembre 12, 2025.
