Ginbulgar sang isa ka mamalidha ang dugang nga mga makaduluda nga pangalan nga ginbutang ni Vice President Sara Duterte nga nakabaton sang iya nga kontrobersyal nga confidential funds.
Suno kay House Deputy Majority Leader kag La Union Rep. Paolo Ortega V, lakip sa mga pangalan nga ini ang naangot sa pagkaon nga amo ang “Jay Kamote” kag “Miggy Mango.”
Sa ginaalegar nga “non-existent” nga recipients sang pondo, ginbutang man sang bise-presidente nga nakabaton ang lima ka mga Dodong nga amo sanday: Dodong Alcala, Dodong Bina, Dodong Bunal, Dodong Darong, kag Dodong S. Barok.
Ginkwestyon ni Ortega kun ano nga sahi sang payroll ini kag kun ini bala himu-himo lang bangud indi man matumod kun matuod ini sila nga mga tawo.
“Una, may chichirya at cellphone. Ngayon, may prutas at kamote na. At higit sa lahat, mukhang ‘Dodong Gang’ na ito! Hindi lang isa, hindi lang tatlo—limang Dodong ang nasa listahan,” suno sa mamalidha.
“Anong klaseng payroll ito? Imaginary? Hindi natin matukoy kung totoong tao ba ang mga tumanggap ng perang galing sa CIF,” dugang pa sini.
Sini nga Marso, matandaan nga una na nga ginbulgar ni Ortega nga may ginhingadlan man si Sara nga recipient nga ang pangalan naangot sa chichirya kag brand sang cellphone.
Ini amo ang “Xiaome Ocho” kag ang mga paryente ni “Mary Grace Piattos” nga sanday “Pia Piatos-Lim” kag “Renan Piatos” nga may tag-isa lang ka T sa spelling sang ila apelyido.
Kaangay kay Mary Grace Piattos kag sa iban pa nga Piatos amo man kay Xiaome Ocho, ang lima ka mga Dodong, si Kamote, kag si Mango ang wala man sang record sang birth, marriage, or death sa Philippine Statistics Authority (PSA).
Una na nga ginpanginwala sang bise nga mga alegasyon sang kurapsyon sang fund misuse. Ginsiling sini nga ang imbestigasyon sang Kamara ang lunsay lamang parte sang “political persecution.”
Gin-impeach siya sang Kamara sang nagligad nga Pebrero 5, apang sa inisyal nga petsa nga gin-propose sa senado, Hulyo 30 pa magasugod ang trial sa upper chamber.#
